كل حاجة كانت تشجعني بش نزيد نحيك أكثر .. تقلي ياللا .. كمل معها..
نتذكر الصُدَف ألي تصير ... مره نقولو نفس الكلمه فرد وقت ...
و مره تسبقني و تقولها قبلي ...

كل شيء كان مظبوط بالمللي علينا كيما يقول المصري ...
غنايتي أخت غنايتك .. ضحكتي بنت ضحكتك ... 
أيه ... نتذكر ...

أنت تتذكر ... أش تتذكر ...
تتذكر ... أنت تضحك و تتبسم و أنا نسرق في غزره ... 
نتذكر ... الحشمه في عينيك ... 
نتذكر البحاه في صوتك ... أحم أحم ...متاعك ...
وقتلي نقلك كلام حلو ... و أنت تدخل بعضك ... 
حاجتين كنت تعملهم ... يا تسكت و تهز راسك لفوق ... بعيد ... للسماء ... 
و الا تغرق في بحر تخمام ... أنا زعما معاك فيه ...
أيه ... نتذكر ...

و أنت أش تتذكر ...
مازلت تتذكر كلامي ألي عمرو ماعجبك ... 
تتذكر كي نقلك رد بالك تبقى موجودة ومش موجودة ... و انت ماتفهمنيش ...
تتذكر كي كنت نڨينها بغناية كاظم أكرهها .... و انت كنت تفد منها برشا ...
خساره كل حاجة باهية في حياتي أخر المطاف 
تولي نوستالجي ... 

كنت عارف روحي ... في الأخير بش نخرج أنا خاسر ... 
خاتر نؤمن بألي الحب الحقيقي هو البدايات ...
كيما قال درويش لا احتاج من الحب الا البدايات ...